هل الوسواس القهري فعلا بخف مع الأدوية ولو كانت الدكتورة فقط بتعالج دوائي من غير علاج سلوكي هل في فائدة مرجوة ومتى ممكن المريض يستغني عن الأدوية؟
وكيف ممكن نعرف إذا المريض عنده هوس مع الوسواس القهري يعني لو كانت ردود الأفعال كبيرة ومش مسيطر عليها وصراخ وإيذاء للنفس زي شد الشعر بطريقة مخيفة مثلا لمجرد محاولة تصحيح سلوك هل هذا عادي ولا ممكن يكون مرض آخر
المريضة بسن المراهقة وفي تاريخ مرض بالعائلة بس هي اول حد يحتاج لدكتور فعلا.
وشكرا جدا

انا شغالة عصبية في مستشفى حكومي .. بيجيلي العيادة حالات محتاجه تفضفض و تعيط و تمشي .. مش معايا اخصائي نفسي ... و باضطر اسمع لهم خاصة لو بنات في الثانوي أو امهات لاولاد صغيرين .. بحاول اوجهم في حدود ليس بصفتي طبيبة و لكن بصفتي عابر سبيل في حياتهم لأنهم غالبا مبيرجعوش تاني
فهل ده مهني؟ و هل اصلا الإرشاد الأسري من وظيفة الطب النفسي ؟ ام وظيفة من؟

انا شخص عقلاني جدا وعندي ذكاء اجتماعي بقدر افهم الإنسان على طول فمش بتفاجئ ولا بحب ولا بكره دايما كل حاجة متوقعاها مع الوقت ومن التجارب مابقتش احب الاختلاط بالبشر خالص هل دا ممكن يأثر على صحتي النفسية فيما بعد؟!

السلام عليكم
انا بحبك في الله عموما عشان كده هسألك... انما انا عمري ما سألت حد على صراحة ولا روحت لدكتور نفسي لاني شايف مشكلتي ملهاش حل
انا قصير القامة 160 سم ومش مميز بأي ميزة تعوض ده وخجول شوية وبرفض اقتراح اي حد لما يكلمني اني اخطب واتجوز لاني مش متقبل نفسي فهل واحدة تانية هتتقبلني؟
فهل ممكن الواحد يعرف يتقبل نفسه فعلا؟

دكتور رامي لو حد عاوز يتعالج معاك يعمل ايه؟ يحجز ازاي وهل اونلاين ولا اوفلاين؟

بشتغل مع مديرة من 12 سنة هي كانت شخص صعب جدا أي غلطة تفضل تزعق وتعلى صوتها بشكل مربع، وأي غلطة من الفريق لازم تخليني طرف فيها أو أكون سبب في أي حاجة، لأن أنا اللي كنت مسؤولة عن الفريق، وصلت لمرحلة أن أي غلطة تحصل في الشغل بكون مرعوبة وحاسة أنها هتتخانق معايا وتبهدلني، قررت أسيب الشغل بس لما ألاقي بديل، والحمد لله ربنا أكرمني ببديل بس مش عارفة اتخلص من المشاعر ديه علطول خايفة ومتوترة وخايفة اي غلطة تحصل من حد في الفريق عشان مكونش أنا السبب، مع أن المدير الجديد مش كده خالص بس طول الوقت منتظرة ده وخايفة ومن كتر الخوف من أني أغلط حاسة اني بقيت أغلط غلطات كتير تافهة

اسفة على الاطالة
عندى ocd ظهر من وانا ١٢ سنة
بس وقتها ما كنتش اعرف حاجة كانت افكار وحشة وسب للذات الالهية وبسبب احساسى بالذنب وقتها وانى عايزة اكفر عن الافكار اللى فى دماغى بدأت معايا وساوس فى الوضوء والصلاة والطهارة كان جلدى بيتقطع من اعادة الوضوء وكنت بقعد فى الحمام بالساعات والصلاة بقت حمل تقيل وقلبى دقاته تزيد قبل ما ابدأ الصلاة علشان خايفة منها وبفضل اشك واعيد ٢٠ مرة او اكتر
فالعبادات عندى بقت تقيلة ومش مصدر للراحة ودا زود حالتى النفسية سوء لانى كارهة العبادات ومش لاقية الراحة اللى الناس بتتكلم عنها روحت لدكتور نفسى مع اهلى وقتها وخفت واتكسفت قدامهم اعلن عن الافكار اللى فى دماغى قولت بس على الوساوس التانية اللى ظهرت بعد الافكار اصلا
وكتبلى دوا وبعد ما اخدته لمدة اسبوعين اهلى شافوا مفيش نتيجة وكانوا رافضين اصلا فكرة العلاج والدكتور وان انا مش مجنونة وكدا ووقفت
فضلت سنين عايشة انى كافرة
لحد كا عرفت ان فيه حاجة اسمها ocd وبدأت اقرأ عنه
وان فيه ناس زيى ودا طمنى شوية وانتشلنى من اليأس اللى كنت فيه
لحد ما دخلت طب ودا كان زود الضغط عليا بسبب الدراسة وكنت عايزة احول بس أهلى رفضوا وقتها قررت اروح تانى لدكتور نفسى علشان حالتى كانت سيئة وروحت من وراهم فى الاول لانى كنت عايشة فى محافظة تانية بسبب الكلية وبدأت العلاج لوسترال وقتها حسيت بتحسن ملموس فى نفسيتى وساوس الوضوء واعادة الصلاة قلت وبقى عندى عزيمة اقاوم شوية الاعادة
بس فضلت وساوس الطهارة والاهم فضلت الصلاة بالنسبالى مجرد شئ بأديه من غير مشاعر من غير اى تأثير وقتها الدكتور قاللى انتى زى المريض اللى بيصلى وعنده جرح بينزف مش هيقدر يركز فى الصلاة
وان صلى على اى حال بس مع ثبات حالى على الوضع دا بدون تقدم جديد فى الوساوس وصلت ل plateau بطلت اروح للدكتور بس فضلت مكملة على العلاج طول سنين الكلية وبدأت الصلاة بعد ما كانت اتحسنت شوية رجعت تانى اتردد واخاف واعيد تكبيرة الاحرام والدخول فى الصلاة نفسه صعب بس بطلت اعادة
عشت طول السنين دى مستنية صلاتى تتحسن وانا عندى ١٣ سنة كنت بقول لما اكبر اكيد هبقى احسن بس لحد دلوقتى وانا كمان ٣ سنين هكمل ٣٠ سنة وانا بصلى ومش حاسة بحاجة ومش قادرة اركز
كانت الافكار بتتراكم وتزيد وقت الصلاة وكنت بحاول وقتها افكر فى اى حاجة تانية مش وحشة علشان اطرد الافكار دى مع الوقت بقى خلاص مش قادرة اركز فى الصلاة وبيحصلى dissociation بسهولة كلها كام ثانية واسرح وقدرتى على التركيز فى الصلاة وفى الحياة عموما بقت ضايعة خالص بسبب الocd والتوتر والقلق ومحاولتى للهروب من التفكير فى كل دا وانى احاول افصل بانى افضل ا scroll down او اتفرج على reels اى حاجة تشتتنى بس مع الوقت أثرت على قدراتى الذهنية
بعد ما كنت فى اوائل دفعتى فى السنين الاولى تراجعت وتقديراتى قلت
رغم كدا فى الاخر حافظت على وظيفة فى الجامعة فى فترة الامتياز روحت لدكتورة تانية لمدة ٨ جلسات وقالت على نوع دوا تانى بس لما ماكنش متوفر قالت اكمل اللوسترال اللى كنت باخده وخلاص ما كنش فيه اى تغيير او تحسن نفس ال plateau اللى كنت وصلته
ونفس الأسئلة امتى هبدأ احس بالصلاة وابطل أخاف منها وابطل اسرح فيها
اخترت نيابة فى الجامعة احد specialities فى الباطنة
بس اكتشفت بعد الاستلام اننا بنتشغل طول النيابة باطنة عامة وبالتحديد بنتعامل مع حالات terminal وممكن فى اليوم الواحد يحصل اكتر من٣ arrest
وبنتشغل فى ظروف stressful ومفيش امكانيات وبنتحط احنا فى مواجهة الاهل
مش مستحملة ضغط النيابة وحالتى النفسية ساءت اكتر من الاول
بقيت مش قادرة ومش عايزة اصحى علشان أبدأ اليوم اصلا
فكرت فى الاستقالة وقدمتها كذا مرة
بس اهلى رافضين وزعلانين وشايفين انى بضيع مستقبلى وان ما عنديش خطة بديلة
بس انا كل اللى عايزاه انى اهرب من وضع مش مستحملاه وغير مناسب لحالتى وشخصيتى اللى بتخاف وتتوتر ومعترفة انى غلطانة لانى قرار زى دا كان محتاج انزل واشوف بنفسى الوضع الأول واشوف مناسب ليا ولا لا لان كان قدامى اختيارات تانية أهدى وأنسب وكان اختيار عشوائى منى
بس انا جلدت نفسى عليه لمدة شهور بس مفيش رجوع بالزمن خلاص
دلوقتى فى أسوأ حالاتى النفسية وانا شايفة نفسى بعانى مع مرضى النفسى ١٣ سنة ومش شايفة نهاية ليه وأثر على بناء شخصيتى اللى بقت ضعيفة وهشة أثر على حياتى المهنية وكملته انا باختيار غلط لتخصص مش مناسب ليا
بعد ما كنت دايما بدور على مواساة لنفسى وان مرضى دا بؤجر عليه وان اكيد كل دا بيحصل لحكمة
كل اللى بيدور فى دماغى دلوقتى ليه كل دا حصل ليه حياتى كلها اتقلبت عند سن ١٢ سنة
ليه اعيش سنين فى معاناة وعياط وقلق وخوف وجلد ذات وليه حتى الحاجة الوحيدة اللى كانت بتفرحنى وهى التفوق الدراسى مبقتش موجودة حتى الاختيار اللى اخترته غلط ليه رغم انى كنت محتارة ما بين اكتر من حاجة اخترت أسوأهم ومش قادرة اكمل فيه ليه ربنا مش راضى عنى وليه لازم حياتى تبقى صعبة بالشكل دا امتى صلاتى هيبقى ليها معنى وزى الناس
سيبت كل حاجة وحاليا مش بطلع من البيت ومنقطعة عن الشغل فكرت اروح لدكتور تالت مرةبس حتى مش عارفة جدوى دا

شخص كان بيشتغل ٣شفتات ٢٤ساعة في الاسبوع فجاة قرر يسيبهم والتحق بشغل شفتات برضه نفس الايام (تدريب بمقابل زهيد جدا هيطوره في تخصصه)وده طبعا تسبب في نقص شديد في الدخل وديون ورافض تماما انه يرجع يشتغل شغله الاولاني بحجة الاحتراق النفسي فهل ده فعلا احتراق نفسي؟أنا حساه عايز يحط مجهوده في حاجة تطوره مش عايز يعيد شغل أتعلمه خلاص حتي لو ده هيقلل مواردنا كأسرة وصعب علينا حياتنا جدا واتسبب في ديون ٠هل دي انانية منه وباصص لمصلحته بس؟ولا احتراق نفسي زي مابيقول انه كره الشغل ومش قادر نفسيا؟

أنا obsessed جدا بفكرة الحاجات اللي المفروض تتعمل يوميا علشان الإنسان ما يحسش بالفراغ وبحس ناس كتير بتقول أنا عندي اكتئاب بس هما في الحقيقة عندهم فراغ .. في رأيك ايه أفضل روتين الواحد يقدر يمشي عليه علشان يقتل الفراغ؟

بتابع مع دكتور نفسي بقالي ٤ سنين بس لسه مكتئب و شايف الحياه سوده و مش راضي عن حاجه و مش عارف اتخطي اي حاجه حصلتلي في الماضي و مؤخرا بقي عندي تسامح مع الافكار الانتحاريه عكس قبل كده. هل من حلول ولا كده خلاص؟

لو هتابع مع حضرتك .اون لاين هل ده متاح ؟

بنتي عندها توحد وانا راضي بس انا جالي اكتئاب مزمن من زعلي عليها وباخد ادويه اكتئاب بقالي ٤ سنين ولسه عندي اعراض الاكتئاب.
اللي حصل ان مبقتش انفعل لما يجلها نوبه غضب.
اعمل ايه عشان ارجع طبيعي

هل الburnout بيجي لحد شغال من سنتين بس وظيفة مرهقة ( تمريض حالات حرجة وعناية )

انا مطلقة من سنين ومعايا شاب ٢١ سنة انا اللي بشتغل وبصرف عايزة احفزه انه يشتغل بيشتغل شوية اه وكتير لأ وغلبت معاه كلام ازاي اقدر اخليه يحب انه يشتغل